Á hora de comprar, os consumidores volvémonos moito máis responsables e esixentes. Queremos produtos respectuosos co medio ambiente, fabricados de forma artesanal, procedentes de cultivos sostibles, ecolóxicos… Agora lemos as etiquetas e informámonos sobre a procedencia, os ingredientes, as certificacións (se as ten), o tipo de envase… E non o facemos só coa comida, tamén o facemos con produtos de limpeza, con produtos de cosmética como o champú, o xel, as cremas… e moito máis cando se trata para os nosos fillos. Queremos produtos que sexan o máis natural posible e que teñan un impacto mínimo no medio ambiente. E como todos estes hábitos son coñecidos polas grandes empresas, por iso, nace o Greenwashing.
Este concepto, cada vez máis familiar a todos nós, fai referencia a aquelas prácticas que levan a cabo as grandes compañías co único obxectivo de aumentar os seus beneficios mediante márketing verde pero sen realmente levar a cabo unha xestión sostible. É dicir, refírese a aquelas empresas que se venden como sostibles pero que en realidade seguen sendo igual de contaminantes que antes de impulsar o seu compromiso ambiental. É reinterpretar a imaxe para vender máis apelando á sensibilidade dos consumidores e inducíndoos cara ao erro.
Que técnicas de Greenwashing existen? Neste artigo imos contar só algunhas pero tede en conta que existen máis:
• Linguaxe ambigua: expresións e palabras sen un concepto ou fundamento claro. Por poñer un exemplo: “amigos do medioambiente”, “procedente de cultivos sostibles”, “comprometidos coa nutrición, o cultivo local e o medio ambiente”, “natural”, “verde”, “sostible”, “libre de tóxicos” ou “libre de produtos químicos”…
• Tamén se poden utilizar outras palabras en diferentes idiomas (preferiblemente o inglés), sendo as máis utilizadas “ clean”, “green” e “organic”.
• Os “Produtos verdes”, utilízase moito no campo da limpeza ou a cosmética, como xa dixemos ao principio deste artigo. Empresas que ofrecen produtos que limpan á perfección pola súa eficacia con cores verdes e imaxes de natureza e “ frescor“, pero que na súa produción, contaminan seriamente as augas de ríos próximos. Ofrecen unha imaxe de saúde perfecta (cosmética), pero en realidade só para o que os utiliza, porque para producilos son necesarios grandes cantidades de compoñentes químicos que evidentemente contaminan. Algúns exemplos de marcas que o utilizan son: Herbal Essences, Aveeno, Johnson’ s Natural, Lush Cosmetics, Natures Organics, Nivea Pure & Natural, Pure and Basics ou The Body Shop.
• Imaxes suxestivas: un exemplo é eses avións que deixan un ronsel de flores no aire cando os vemos circular.
• Os nomes; etiquetas coa recensión de ecolóxico, biolóxico e orgánico, así como as súas abreviaturas habituais («bio», «eco», etc.), tiveron que ser protexidas para que non sexan utilizadas de forma fraudulenta en produtos alimenticios que non cumpran a lexislación Europea.
Exemplos de grandes compañías internacionais: CocaCola Life… Súper sa!
Outro caso moi coñecido de exemplo de Greenwashing é o de McDonalds, empresa acusada máis dunha vez de malas prácticas. A comunicación tenta vender que a obtención das súas materias primas é cada vez máis sostible. Ademais de pintar de verde moitos dos seus restaurantes e deixando de lado a antiga cor vermella que a caracterizou sempre.
0 comments :
Publicar un comentario