1500 convivium
en todo o mundo
Home » » Sacrapastas

Sacrapastas

Tamara Castro é a fundadora e responsable de SACRAPASTAS. Un dos seus obxectivos co nacemento desta marca, é manter viva a tradición centenaria das pastas de manteiga “Galletas de Xián”, considerándoas auténticas embaixadoras doces do territorio no que se elaboran: a Ribeira Sacra. Absolutamente impregnadas da beleza desta terra máxica, inspíranse na súa arte románica, da que nacen os gravados plasmados en cada galleta. E nos seus seres mitolóxicos, as Xacias, figura protagonista da marca. 


Elabóranse no obradoiro da Panadería Darío, empresa de carácter familiar, en Taboada, que dende o ano 1986 ata a actualidade, fai produtos de calidade totalmente artesáns, como son as “Galletas de Xián”, pastas típicas do Concello de Taboada que venden na panadaría desde os inicios. Primeiro facíanllas as señoras de Xián, que tamén vendían en feiras e mercados e logo, cando estas pioneiras por cuestión de idade, non podían facer as galletas, deixáronlles a receita no obradoiro para que continuasen coa tradición das mesmas. 

Nun inicio, na parroquia de Xián, estas galletas cocíanse de dúas en dúas, entre pranchas de ferro na lareira (cheminea), logo co retorno da emigración, trouxeron unhas máquinas que se enchufaban á corrente,  nas que se cocían 4 galletas de cada vez. Ata o ano 2021, na panadaría tamén traballaban con estas máquinas pero decidíronse a innovar no proceso de elaboración das mesmas para ter unha máquina con máis capacidade produtiva que lles permitise dalas a coñecer máis alá de Taboada. Para elo, crearon e personalizaron unha máquina na que poden cocer 24 galletas, permitíndolles facer nunha soa cocción moitas máis. Aínda así, todo o proceso de elaboración ten un acentuado carácter artesanal, require moitas horas de man de obra, xa que, unha a unha, cada galleta ten que ser tratada coa delicadeza que a caracteriza.

En febreiro do 2023 presentáronas na feira do Caldo de Ósos de Taboada co novo packaging e os novos gravados plasmados en cada galleta que están inspirados no territorio no que se elaboran, na Ribeira Sacra, e renden homenaxe ás avoas, ás mulleres do rural e as familias que souberon namorar a todo un pobo coas súas  galletas, preservando e transmitindo esta receita de xeración en xeración. 


A intención da marca SACRAPASTAS é a de protexer, transmitir e pór en valor a cultura gastronómica referente á repostería caseira da súa zona, que se facía nas casas do rural galego, visibilizando as verdadeiras protagonistas da historia, as mulleres que elaboraban estas receitas doces a partir de produtos que a maioría das veces tamén tiñan na casa, como a fariña do trigo que cultivaban, os ovos das galiñas que criaban ou a manteiga que facían do leite das vacas da casa. Todos estes ingredientes de calidade daban como resultado unhas galletas cun sabor excepcional que grazas á transmisión de saberes podemos seguir gozando. SACRAPASTAS mantén a máxima calidade dos ingredientes e aposta por produtos de proximidade como sinais de identidade da marca, para obter o auténtico sabor de sempre. 


  

Contacto:


Rúa Nova, 2, Taboada, C.P. 27550 (Lugo)

☏  982 465 057 - 686 74 69 52 | ✉ sacrapastas@gmail.com

Web: sacrapastas.com - panaderiadario.com


SHARE

About Leo

0 comments :

Publicar un comentario