1500 convivium
en todo o mundo

Entrelampo

Entrelampo é unha asociación sen ánimo de lucro que ten como obxectivo principal crear emprego para persoas con problemas graves de saúde mental a través de iniciativas de economía social centradas no sector agroalimentario.

Só o 5% das persoas con problemas graves de saúde mental traballan, e a maioría dos que conseguen traballo pérdeno en menos de seis meses. Trátase dun grave problema de xustiza social que atenta contra dereitos fundamentais.

Os motivos desta terrible situación son multifactoriais. Os que implican aos propios problemas de saúde son unicamente a punta dun iceberg formado fundamentalmente polas barreiras sociais que conforman o estigma social e o modelo capacitista e lucrativo no que vivimos.

A súa aposta é clara pola creación de emprego como piar fundamental dende onde poida desenvolver un proxecto laboral integral. Entrelampo aséntase sobre tres piares:

-Emprego: a prioridade inmediata é a creación de emprego, a base de calquera proxecto laboral.

-Empresa social: o obxectivo final é a inclusión laboral nas empresas da Economía Social.

-Visibilidade: apostar por iniciativas con alta visibilidade, credibilidade e recoñecemento.

O seu proxecto pretende ser o máis coherente posible a nivel social e medioambiental. Cren que o consumo agroecolóxico é a pedra angular para conseguir un cambio real.

Por iso, a súa primeira iniciativa é unha horta agroecolóxica na parroquia de Marrozos (Compostela). Actualmente cultivan unha superficie de preto dunha hectárea e están inscritos no Craega (Consello Regulador da Agricultura Ecolóxica de Galicia). Entre as súas verduras podemos atopar ao longo do ano: acelgas, espinacas, brécol, col, repolo, grelo de Santiago, leitugas, tomate negro de Santiago, cenorias, cebolas, patacas, xudías, pementos de Padrón, porro, chícharos... Ofrecen os seus produtos a domicilio a consumidores responsables, tendas, e hostalaría da zona de Compostela e arredores seguindo a filosofía de Km 0.


No 2022 tamén ofrecerán ovos de galiñas en réxime ecolóxico baixo a súa marca “Xema e Clara”, tamén na parroquia de Marrozos.


Contacto:

Enderezo: 15893 Argadán, A Coruña

E-mail: entrelampo@entrelampo.com

Web: entrelampo.com 

Facebook: facebook/entrelampogalego



SHARE

About Leo

0 comments :

Publicar un comentario