1500 convivium
en todo o mundo
Home » » "Xantar de vagar en Terras da Mariña"

"Xantar de vagar en Terras da Mariña"

O pasado sábado 5 de setembro celebrouse no Hotel***Restaurante Rías Altas de Barreiros o primeiro de catro xantares que percorrerán Galicia evocando as tempadas gastronómicas. O evento cebrouse cunha asistencia de 24 persoas, xa que por mor do escenario covid, a recomendación do manual do Ministerio é de non sobrepasar os 25 asistentes. Ata Barreiros desprazáronse 20 blogueiros especializados en gastronomía -algúns tamén en viaxes- que tiveron a oportunidade de degustar produtos de calidade da zona. Tamén estiveron Ana Belén Ermida Igrexas, alcaldesa do Concello de Barreiros e Tania Hermida Varela, de Turismo A Mariña Lucense. O presidente da Mancomunidade de Concellos de A Mariña Lucense, Fran Cajoto, tivo unhas palabras de benvida para tódolos comensais que alí se congregaron.

Dada a ubicación do Rías Altas, en plena zona da Faba de Lourenzá, o prato principal foi centrado neste produto que estivo acompañado doutros produtos certificados como o cordeiro ecolóxico. A elección do restaurante veu determinada, en grande medida, por ser un dos nosos Km 0. Coñecemos o bo facer da súa cociña, o respecto que teñen pola orixe dos produtos cos que traballan, e Felisa, a súa cociñeira, busca conservar as receitas tradicionais de sempre, dándolle protagonismo á materia prima por enriba da elaboración. 


O menú elixido estivo pensado para poñer en valor os produtos galegos de calidade certificada. Serviuse un primeiro  composto por torreznos de porco celta ecolóxico acompañado de pan de Cea, da I.X.P.; guiso de fabas de Lourenzá da I.X.P. con cordeiro eco, de segundo; e crema de queixo da D.O.P. O Cebreiro con viño para o postre. 

Para a sobremesa, contamos cos licores do consello regulador de augardentes e licores tradicionais de Galicia. Os comensais puideron degustar a súa augardente de herbas, o seu licor café, augardente envellecida e augardente de Galicia. Non faltaron o café e as infusións ecolóxicas. Todo isto moi ben acompañado polos viños das catro adegas que compoñen a I.X.P. Ribeiras do Morrazo: Bodega Os Areeiros, Adega Ardán, Mercedarios Monasterio San Juan de Poio (o único viño de Galicia elaborado nun convento) e Bodega Reboraina.


A xornada non estivo exenta dunha parte divulgativa onde se explicou aos asistentes, entre outras cousas, o valor das certificacións, como distinguir os produtos que temos certificados en Galicia e o impacto que teñen na consecución dos Obxectivos de Desenvolvemento Sostible (ODS) da ONU.

Rocío García, secretaria de Slow Food Compostela

O xantar que foi, como ben di o seu nome, de vagar, rematou ás 17,15 da tarde e tivo unha continuación cunha visita guiada de Turismo de Lourenzá. Como parte do valor patrimonial gastronómico da xornada, fíxose parte da Ruta da Faba onde se puido apreciar o patrimonio cultural da zona e o impacto socioeconómico da creación da I.X.P. na contorna. Tamén visitamos o Centro de Interpretación da Faba ata onde se achegou o concelleiro de cultura do concello, Manuel Arango, para darnos a todos e todas a benvida.

José Cuadrado, "Pepe", presidente da I.X.P. Faba de Lourenzá


SHARE

About Leo

0 comentarios :

Publicar un comentario